Ишембай мәктәбенең уҡыусылар советы – ил конкурсы финалында

Ишембайҙың 18-се мәктәбенең уҡыусылар советы “Территория УСпеха” Бөтә Рәсәй конкурсының финалына сыҡҡан. Команда илдең иң көслө 30 командаһы иҫәбенә ингән.

Конкурс “Йәштәр һәм балалар” милли проектының “Рәсәй – мөмкинлектәр иле” федераль проекты сиктәрендә ойошторола.

Уңышҡа юл 18-се мәктәп уҡыусыларының тырыш эше менән һалынған. Мәктәп  Башҡортостандың 2025-26 йылғы “Уҡыусылар үҙидараһы” төбәк программаһында ҡатнаша. Программа уҡыусыларҙың лидерлыҡ сифаттарын асыуға, инициативаларына булышлыҡ итеүгә һәм уҡыусылар үҙидараһының һөҙөмтәле моделен төҙөүгә йүнәлтелгән. Ошондай мөхит балаларҙы ҡарарҙар ҡабул итергә, проекттар ойошторорға һәм дөйөм эш өсөн яуаплылыҡ алырға өйрәтә.

“Финалға сығыу – уҡыусылар советының инициативлығын, тупланғанлығын һәм өлгөрөп еткән гражданлыҡ позицияһын таныу ул. Балалар уҡыусылар үҙидараһының формаль нәмә түгел, ә мәктәп тормошона һәм шәхсән компетенцияларҙы үҫтереүгә  ысынлап та  йоғонто яһарлыҡ ҡорал икәнен иҫбатланы”, – ти 18-се Ишембай мәктәбенең тәрбиә буйынса директор урынбаҫары Наилә Авезова.

Сығанаҡ: Ишембай районы йәштәр эштәре буйынса комитеты.